Itinerari II- Shtegu i Liqeneve

Ky shteg përshkon kodrat e buta në perëndim të qytetit të Kavajës si dhe bregun e Spillesë, Deti Adriatik. Kryesisht është një itinerar me fokus tek natyra. Në bazë të studimit dhe analizës paraprake, është realizuar ky shteg bashkë me itinerarin, pasi ofron një peisazh natyror tepër intrigues, duke u nisur nga plazhi i Sipllesë, ku ka dhe mundësi për të parkuar makinën ose mjete të tjera, për të vazhduar më tej drejt lindjes duke ngjitur kodrat e buta, me lartësi maksimale deri ne 190 m.

Në vijim të itinerarit, shumë pranë fshatit Spille gjendet një burim natyror i cili mund të jetë opsional për t’u vizituar. Vazhdohet me ngjitjen nëpër kodrat e buta, ku kemi disa pika panoramike, me fusha të mbjella. Veçantia e këtij itinerari janë 5 liqenet artificialë të cilët, në ngjitje e sipër shfaqen gjatë gjithë ecjes.

Prezenca e tyre e shtrirë në hapësirën ku kalon shtegu, ka bërë të mundur që ky itinerar të quhet “Shtegu i liqeneve”. Me interes të veçantë është pylli i Bedenit. Pikat panoramike janë mbresëlënëse pasi gjatë rrugës ndeshim pyje në bregun ranor, burime uji, pamje panoramike me liqene, peisazhe bujqësore, si dhe pyllin e dendur i cili është edhe pika më interesante e gjithë itinerarit duke përfunduar në zbritje përsëri pranë brezit me pisha të plazhit të Spillesë, për të arritur tek pika e nisjes, duke marrë kështu pak a shume formën e një “unaze”.